ფაბიო კოენტრაო მადრიდის "რეალის" ისტორიაში საუკეთესო მცველი ნამდვილად არ ყოფილა და არც რჩეული უკანახაზელების რიგები დაუმშვენებია, თუმცა "სამეფო კლუბისთვის" წლების განმავლობაში საჭირო ფიგურა გახლდათ და წარმატებული კარიერით, სტაბილურობითა და უხვი რაოდენობის უპრესტიჟულესი ტიტულებითაც ნამდვილად დაიკვეხნის.
მსოფლიოს ისტორიაში ყველაზე ტიტულოვან კლუბში გატარებული 7 წლის, ორჯერ ჩემპიონთა ლიგის, ამდენივე ევროპის სუპერ თასისა და 3 მსოფლიოს საკლუბო ჩემპიონატის მომგებმა მარცხენა მცველმა, რომელსაც პერსონალურ რეზიუმეს ლა ლიგის 2 ტიტულიც უმშვენებს, ზუსტად 1 წლის წინ, 2021 წლის 1 ივლისს პროფესიონალური კარიერა მშობლიურ კლუბ პორტუგალიურ "რიუავეში" დაასრულა და ამ ეტაპზე ფეხბურთისკენ მიბრუნებასა და ყურადღების ეპიცენტრში ყოფნას მშვიდი ცხოვრება არჩია.
როგორც ირკვევა, 34 წლის ვეტერანი სპორტსმენი ამჟამად თავისი დროის უდიდეს ნაწილს ხმელეთის ნაცვლად წყალში ატარებს და ბავშვობის ოცნების ახდენას ცდილობს, ოცნების, რომელსაც მეთევზეობა ჰქვია.
ყველაფერი იმით დაიწყო, რომ კოენტრაომ კარიერის დასრულების შემდეგ პირველი ნავი იყიდა, ახლა კი სათევზაო გემების ფლოტს ფლობს და ამ ყველაფრით უდიდეს სიამოვნებასაც იღებს.
"ზღვაში ცხოვრება სირცხვილი არ არის, როგორც ეს ბევრს ჰგონია. ეს ისეთი სამუშაოა, როგორც სხვა დანარჩენი. და არა მხოლოდ ეს, ზღვა ლამაზია და ის გვჭირდება. ადამიანებს, რომლებსაც უყვართ ზღვა და ვისაც უნდათ ზღვაში მუშაობის გამოცდილების მიღება, უნდა მიჰყვნენ თავიანთ ოცნებას.ეს ასევე სამუშაოა ახალი თაობებისთვის. მამაჩემს ნავი ჰყავდა, თევზაობდა და ბავშვობაში ყოველთვის მასთან ერთად დავდიოდი, ჩემი ცხოვრება ზღვა იყო... ზღვა და თევზაობა.რა თქმა უნდა, ვიცოდი, რომ ერთ მშვენიერ დღეს ფეხბურთი დასრულდებოდა და ჩემს ცხოვრებაში ახალი მიმართულება უნდა ამერჩია. ჩემი ბედნიერება ეს ნავია და ეს ის ცხოვრებაა, რომლის წარმართვაც მინდა", - თქვა კოენტრაომ Empower Brands-ის YouTube არხთან საუბრისას.
გარდა იმისა, რომ პორტუგალიელი ფეხბურთელისთვის ეს საყვარელი საქმიანობა და ჰობია, მან ამით ადამიანის სიცოცხლეც კი გადაარჩინა, თანაც არა ერთის, არამედ 15 მეთევზის, რომელთა გემიც ჩაიძირა, მაგრამ, კოენტრაოს წყალობით ისინი სიკვდილს გადაურჩნენ.
საინტერესოა შეცურავს თუ არა გემი სახელად - "ფაბიო კოენტრაო" კვლავაც საფეხბურთო ოკეანეში და აუშვებს თუ არა იგი ახალ აფრას, თუმცა ნათელია, რომ პორტუგალიელის ცხოვრება ამ ეტაპზე დინების მიმართულებით მიცურავს და ახალ თავგადასავალს ეძებს...
