ალბან ლაფონი გახდა მე-13 ფეხბურთელი, რომელმაც L’Equipe-სგან უმაღლესი შეფასება მიიღო

საფრანგეთის ლიგა 1-ის 25-ე ტურში ,,ნანტმა” ,,პარი სენ ჟერმენს” უმასპინძლა და 3:1 დაამარცხა. გამორჩეული შეხვედრა ჩაატარა მასპინძელი გუნდის მეკარემ, ალბან ლაფონმა, რომლის თამაში ფრანგულმა გამოცემამ, L’Equipe-მა,  უმაღლესი (10) ქულით შეაფასა, ასეთი რამ კი ისტორიაში მხოლოდ მეთოთხმეტედ მოხდა.

ლაფონმა პარიზელებთან მატჩში 8 დარტყმა მოიგერია, მათ შორის ნეიმარის თერთმეტმეტრიანიც და გახდა მესამე მეკარე (პირველი 1997 წლის შემდეგ), რომელსაც გაზეთმა 10 ქულა დაუწერა.

ფეხბურთელები, რომლებმაც L’Equipe-სგან უმაღლესი შეფასება მიიღეს:

1. ფრანკ სოზე – 21-წლამდელებს შორის 1988 წლის ევროპის ჩემპიონატის ფინალში სოზემ საბერძნეთთან მოგებულ მატჩში (3:0) დუბლი გაიფორმა.

2. ბრუნო მარტინი – საფრანგეთის ნაკრების მეკარემ იმავე მატჩში კარი მშრალად შეინახა და გაზეთისგან უმაღლესი შეფასება დაიმსახურა.

3. ოლეგ სალენკო – რუსმა თავდამსხმელმა 1994 წლის მსოფლიო ჩემპიონატზე კამერუნს 5 გოლი გაუტანა.

4. ლარს ვინდფილდი – ორჰუსის დანიელ მეკარეს L’Equipe-მა ათიანი ნანტთან მატჩში დაუწერა.

5. ლეო მესი – 2010 წელს ლეომ არსენალს ჩემპიონთა ლიგის მეოთხედფინალში პოკერი შეუსრულა.

6. ლეო მესი – 2 წლის შემდეგ, მესიმ ლევერკუზენის კარი 5-ჯერ აიღო.

7. რობერტ ლევანდოვსკი – 2013 წელს პოლონელმა ჩემპიონთა ლიგის ნახევარფინალში რეალს 4 გოლი გაუტანა.

8. კარლოს ედუარდო – ნახევარცველმა 2014 წელს გენგამთან 7-2 მოგებულ მატჩში თავი 5-ჯერ გამოიჩინა.

9. ნეიმარი – 2018 წელს პარი სენ ჟერმენმა დიჟონს 8:0 მოუგო, ნეიმარმა 4 გოლი გაიტანა და 2 საგოლე გადაცემა მიითვალა.

10. დუშან ტადიჩი – რეალთან სტუმრად მოგებულ შეხვედრაში (4:1) ტადიჩმა მეტოქეს მხოლოდ ერთი გოლი გაუტანა, მაგრამ სერბის შესანიშნავი თამაში მაინც 10 ქულით შეფასდა.

11. ლუკას მოურა – ჩემპიონთა ლიგის 2018/2019 წლების სეზონში ტოტენჰემმა ნახევარფინალური ეტაპი აიაქსთან საოცარი ქამბექით დაძლია, ლონდონელების სამივე გოლი ლუკას მოურას ანგარიშზეა.

12. სერჟ გნაბრი – ბაიერნის შემტევმა 2019 წელს ტოტენჰემის კარი 4-ჯერ აიღო.

13. კილიან მბაპე – 22 წლის ფეხბურთელს ეროვნულ ნაკრებში შესრულებული პირველი პოკერი ფრანგულმა გაზეთმა 10 ქულით დაუფასა.


ალბან ლაფონი გახდა მე-13 ფეხბურთელი, რომელმაც L’Equipe-სგან უმაღლესი შეფასება მიიღო

სტატიის ავტორი
-