ბელინგემი - რეალის მთავარი სამიზნე

Goal.com-ის ინფორმაციით, 2023 წელს, ჯუდ ბელინგემი გუნდის მთავარი სამიზნე იქნება და სავარაუდოდ, ინგლისელი ნახევარმცველი არჩევანს მადრიდულ გრანდზე შეაჩერებს.

კაზემირო - მოდრიჩი - კროოსის ეპოქა დასასრულს უახლოვდება. კაზემირომ გუნდი უკვე დატოვა, მოდრიჩი 37 წლისაა, კროოსი კი მალე 34-ის გახდება. თაობის ცვლის პროცესს "რეალი" წარმატებით ახორციელებს, რადგან ვალვერდემ, ჩუამენიმ და კამავინგამ გუნდთან ადაპტაცია უკვე გაიარეს.

იმ შემთხვევაში, თუკი აღნიშნულ ტრიოს ბელინგემიც შეუერთდება, "რეალი" გაუვალ, რკინა-ბეტონის ნახევარდაცვას შექმნის, რომლის მსგავსიც დღევანდელ ფეხბურთში არ მოიძებნება.

Goal.com იტყობინება, რომ ბელინგემის შეძენაზე პრეტენზიას "რეალი" და "ლივერპული" აცხადებენ. თუმცა ამ ბრძოლაში, ფავორიტად მადრიდული კლუბია მიჩნეული.

2020 წელს, ახალგაზრდა ნახევარმცველის სანაცვლოდ, "დორტმუნდმა" "ბირმინგემს" €25 მილიონი გადაუხადა. კონტრაქტში აღნიშნული იყო, რომ ბელინგემის სხვა გუნდში გაყიდვის შემთხვევაში, "ბირმინგემი" სატრანსფერო თანხის 5%-ს მიიღებს.

Transfermarkt-ის თანახმად, 19 წლის ცენტრალური ნახევარმცველის ღირებულება დღეს €110 მილიონს შეადგენს.