დავით მუჯირი: “ეროვნული ლიგის 36 ტურად ჩატარება ფიზიკურად შეუძლებელია”

საქართველოს ფეხბურთის ფედერაციამ ეროვნული ლიგის და ლიგა 2-ს კლუბების წარმომადგენლებთან ვიდეო-კონფერენცია გამართა. კონფერენციაზე ფედერაციის გენერალურმა მდივანმა დავით მუჯირმა და ფეხბურთის განვითარების ფონდის დირექტორმა შალვა გოგოლაძემ კლუბების ხელმძღვანელებს სეზონის გაგრძელების ვარიანტები გააცნეს.

დავით მუჯირის თქმით, ეროვნული ლიგის 36-მატჩიანი ფორმატით დასრულება შეუძლებელი იქნება.

“დღევანდელ ვიდეო კონფერენციაში მონაწილეობას იღებდნენ ეროვნული ლიგისა და ეროვნული ლიგა 2-ის კლუბების ხელმძღვანელები. დღევანდელ კონფერენციაში ასევე ჩართული იყო ქართული ფეხბურთის განვითარების ფონდის დირექტორი, შალვა გოგოლაძე, რომელმაც დაადასტურა, რომ ამ ეტაპზე ყველა კლუბს შეუნარჩუნდება ის საბაზისო დაფინანსება, რომელიც 2020 წლის ბიუჯეტით იყო გათვალისწინებული.

დღევანდელ ვიდეო კონფერენციაზე ჩვენ კლუბებს მივაწოდეთ სრული ინფორმაცია იმ სიახლეების შესახებ, რომელზეც ჩვენ 1 აპრილს უეფასთან გამართულ ვიდეო კონფერენციაზე ვისაუბრეთ. კლუბებს ასევე მოვახსენეთ იმის შესახებ, რომ აღნიშნულმა სიახლეებმა შესაძლოა ფორმატის ცვლილებაც გამოიწვიოს. მოგეხსენებათ, რომ მომავალი ევროტურნირების სეზონი უეფამ ერთი თვით გადადო და ის ივლისის მაგივრად აგვისტოში დაიწყება, თუმცა ეს მხოლოდ სავარაუდო სცენარია.

აქედან გამომდინარე, დღევანდელ ვიდეო კონფერენციაზე ჩვენ კლუბებს გავაცანით ფეხბურთის ფედერაციის სამოქმედო გეგმა. ეროვნული ჩემპიონატის აღდგენა რამდენიმე ფაქტორზეა დამოკიდებული, დღევანდელი მოცემულობით შეიძლება ითქვას, რომ უკვე ფიზიკურად შეუძლებელია სეზონის 36 ტურად ჩატარება. ამიტომ როდესაც ცნობილი გახდება ჩემპიონატის დაწყების სავარაუდო თარიღი, კლუბებთან ერთად, სამუშაო ჯგუფი და ჩვენი საშეჯიბრო განყოფილება მაქსიმალურად შეეცდება, რომ 2020 წლის სეზონის ფორმატი რეალობას მოარგოს.

ეს ყველაფერი დამოკიდებულია იმაზე თუ როდის დაადასტურებს უეფა საევროტურნირო და სანაკრებო კალენდარს. ამასთან ერთად რა თქმა უნდა, ჩვენ საშუალება უნდა გვქონდეს, რომ ჩვენი ქვეყნის შიგნით განვაახლოთ ჩემპიონატი. ამ ყველაფრის გათვალისწინებით რაიმე კონკრეტულ სცენარზე საუბარი ამ ეტაპზე ნაადრევია. მითუმეტეს, რომ ის გუნდები, რომლებიც საქართველოს მომავალ ევროტურნირებზე წარმოადგენენ უკვე გამოვლენილი არიან.

იმედს ვიტოვებ, უეფას პოზიტიურ გათვლებზე დაფუძნებული სცენარი გამართლდება და ის კიდევ ერთხელ არ შეიცვლება.” – განაცხადა დავით მუჯირმა.

(82)

დავით მუჯირი: “ეროვნული ლიგის 36 ტურად ჩატარება ფიზიკურად შეუძლებელია”

სტატიის ავტორი
-