ბრიტანელი სამართალდამცველების მიერ გავრცელებული ინფორმაციით, მაშველების მიერ წყლიდან ამოყვანილი ცხედარი ემილიანო სალას ეკუთვნის. დორსეტის პოლიციის დეპარტამენტის წარმომადგენლებმა აღნიშნულის შესახებ უკვე აცნობეს ემილიანო სალას ოჯახს.
"პორტლენდის პორტში 2019 წლის 7 თებერვალს გადმოსვენებული ცხედარი იდენტიფიცირებულია. შესაბამისი პროცედურების დასრულების შემდეგ დადასტურდა, რომ მაშველებმა წყლიდან ემილიანო სალას ცხედარი ამოიყვანეს."
"ემილიანო სალასა და პილოტის, დევიდ იბოტსონის ოჯახის წევრებს უკვე ეცნობათ აღნიშნულის შესახებ", - განაცხადეს დორსეტის პოლიციის დეპარტამენტის თანამშრომლებმა.
აღნიშნულთან დაკავშირებით საფეხბურთო კლუბმა "კარდიფმა" სამძიმრის წერილი გამოაქვეყნა და ემილიანო სალასა და დევიდ იბოტსონის ოჯახებს თანადგომა აღუთქვა.
