ენდი რობერტსონი: როგორი უნდა იყოს სრულყოფილი მარცხენა მცველი 

"ამ პოზიციაზე თამაში ფიზიკურად ძალიან კარგ მომზადებას მოითხოვს, მაგრამ მე სირბილი არასდროს მეზარებოდა და ამ ამოცანისთვის თავის გასართმევად საკმარისი ენერგია მაქვს. შენ გევალება რომ თამაშის ყველა ასპექტში მონაწილეობა მიიღო და მასზე სხვადასხვა გზით გავლენა მოახდინო. ჩვენ, ფლანგის მცველებს, შეტევაში გარკვეული უპირატესობა გვაქვს: როცა უბურთოდ ვართ, შეგვიძლია მცველების ყურადღების არეალიდან გავქრეთ, მათი ბარიერის დაძლევის შემთხვევაში კი მეტი თავისუფლება გვენიჭება. ეს დიდ ზეწოლას მოითხოვს, თუმცა ეს ჩემთვის სასიამოვნოა. მე ვარ იმ ტიპის მოთამაშე რომელიც მოედანზე ყოველთვის მაქსიმუმს დებს", - პასუხობს 26 წლის ფეხბურთელი კითხვაზე, თუ როგორი უნდა იყოს კლოპის გუნდში მარცხენა მცველი.

გოლების შექმნა 

ჟურნალისტი: "ასეთ სიტუაციებში კონკრეტულ ზონებს ან ფეხბურთელებს იღებთ მიზანში?" რობერტსონი: "სხვადასხა ეპიზოდში ეს განსხვავებულად ხდება. უფრო ხშირად თავს ვწევ და ვცდილობ ფეხბურთელის მოძებნას, რათა ყველა შესაძლო ვარიანტი გავაანალიზო და საუკეთესო მათგანი ავარჩიო. უნდა შევაფასო სიტუაცია და დავრწმუნდე არის თუ არა ისეთი თანაგუნდელი, რომელიც საჯარიმოში შერბის და რომლისთვისაც ბურთის გადაგდება საუკეთესო ვარიანტი იქნება.

"თავდასხმაში ჩართვის და წინა ხაზის მოთამაშეებთან დაკავშირების ნება მიღებული მაქვს, მჯერა, რომ მცველები წინ აქტიურად უნდა მიდიოდნენ. ეს ისაა, რაც მსურს. საბედნიეროდ, გუნდში ამის თავისუფლება მაქვს და ეს მეხმარება, რომ ჩემი საუკეთესო თვისებები წარმოვაჩინო. "ჰალში" თამაშის დროს თავდაცვითი აზროვნება უნდა მქონოდა, რადგან უმეტეს შემთხვევაში ჩვენ მეორე ნომრად თამაში გვიწევდა. მაშინ წინ ამ სიხშირით არ მივდიოდი. შესაძლოა, 90 წუთის განმავლობაში მეტოქის ნახევარზე ბურთიანად ერთხელ ან ორჯერ გადავსულიყავი, ახლა ამას საშუალოდ 10 ან 11-ჯერ ვაკეთებ", - ამბობს რობერტსონი.

კავშირი მანესთან 

"ვფიქრობ, ეს არის ის, რაც დროთა განმავლობაში სულ უფრო და უფრო უკეთესი ხდება. მე და სადიოს ახლა ერთად ბევრი თამაში გვაქვს ჩატარებული და გუნდში მოსვლის დღიდან, ჩემი ფიქრები მოედანზე უმეტესად სადიოს უკავშირდება.  ჩვენი ურთიერთობა ფანტასტიკურია. მან იცის რას ველოდები მისგან უკან დახევის შემთხვევაში, ანუ როცა დაცვაში დახმარება მჭირდება. მე ვიცი, რას ელის ჩემგან წინსვლისა და მასთან კავშირის მცდელობის შემთხვევაში. ეს არის ის, რამაც ჩვენს გუნდს ამ ფლანგზე ბევრი წარმატება მოუტანა. ჩვენ საკმაოდ კარგად ვუგებთ ერთმანეთს. ხშირად მე მას ზონებს ვუთავისუფლებ, ზოგჯერ კი პირიქით, საგოლე შანსებს ვუქმნი", - თქვა შოტლანდიელმა.

"საწვრთნელი პროცესისას ჩვენ სხვადასხვა კომბინაციების დამუშავებაზე ბევრს ვმუშაობთ. იმაზე, თუ როგორ უნდა გავარღვიოთ მეტოქის დაცვა და როგორ ვიპოვოთ გასაღები. ვცდილობთ შევიმუშავოთ სქემა, რომლის მიხედვითაც, წამების სიზუსტით მოვახერხებთ შედეგიანი კომბინაციის გათამაშებას. ვარჯიშზე შესაძლოა ნებისმიერი რამ სცადოთ, მაგრამ მთავარი მაინც მატჩია და ის თუ რას გააკეთებთ მოკლე დროში თამაშის დროს. ამ დროს უნდა შეძლოთ საუკეთესო გადაწყვეტილების მიღება. ბოლო სამი წლის განმავლობაში ვნახეთ, რომ სადიომ საგრძნობლად მოუმატა. დამაგვირგვინებელ ფაზაში ის თავის საქმეს საუკეთესოდ აკეთებს და ამის გამო, მსოფლიოში გამორჩეულია. მან თავისი თამაში უმაღლეს დონეზე აიყვანა. ვფიქრობ, რომ როგორც ფეხბურთელები ერთმანეთს დავეხმარეთ. ჩვენი საქმეა, რომ მეტოქე გუნდს მარჯვენა მხრიდან რაც შეიძლება მეტი პრობლემა შევუქმნათ. ამასთანავე ჩვენ ყოველთვის ვცდილობთ გავუმჯობესდეთ", - თქვა რობერტსონმა.

ორმაგი მოქმედება ალექსანდრ-არნოლდთან

ვიცით, რომ ბევრი გუნდი ცდილობს დაიჭიროს არნოლდი და შეცდომა დააშვებინოს, ჩვენ კი ამით ვსარგებლობთ, რადგან თუ არნოლდი მოედნის ერთ მხარესაა, სადაც ბურთია, ეს ნიშნავს, რომ საპირისპირო ზონა თავისუფალია და ეს უნდა გამოვიყენოთ. იმის ნაცვლად, რომ ბურთს უკანა ხაზის გასწვრივ ან ნახევარმცველებთან ვათამაშებდეთ, ზოგჯერ არნოლდი მეტოქისკენ პირდაპირ მიდის და ეს მოწინააღმდეგეს სიტუაციასთან ადაპტირებას ურთულებს. ეს არის ის, რის გაკეთებასაც ვცდილობთ. ჩვენ ამას საკმარისად ხშირად ვაკეთებთ, ამიტომ მთავარია ამ სქემის შეცვლა. არ უნდა ვიყოთ პროგნოზირებადები და ჩვენი ტაქტიკა მეტოქისთვის თავიდანვე შეცნობილი არ უნდა იყოს. შეგვიძლია დავტვირთოთ მცველები, ჯო გომესი და ვირჯილ ვან დაიკი.

ვფიქრობ, რომ ფლანგის მცველები ჩვენი გუნდის თამაშის მნიშვნელოვან ნაწილად იქცნენ. როცა მე და ტრენტი მეტოქეს პრესინგს ვეთამაშებით, ეს გვაძლევს შანსს, რომ შუაში მყოფ მეტოქეს კონცენტრირება დავაკარგვინოთ და დაცვიდან შეტევაში საკმაოდ სწრაფად გადავინაცვლოთ. მჯერა, რომ ორივე ჩვენგანს ამისთვის შესაბამისი ხარისხი აქვს და ეს ბოლო ორი წლის განმავლობაში კარგად ვაჩვენეთ. ზოგჯერ მე და ტრენტი საწვრთნელი სესიის დასრულების შემდეგ ვრჩებით და ერთად ვვარჯიშობთ. მას ყველა ის თვისება აქვს, რომელიც მსოფლიოში საუკეთესო მარჯვენა მცველს უნდა ჰქონდეს. ის ყოველთვის ცდილობს იყოს შედეგიანი, მისი დიაგონალური პასები კი საერთოდ გასაოცარია. თუკი ზოგიერთი ფეხბურთელი საჯარიმო დარტყმებისა და პენალტების შესრულებაზე ვარჯიშობს, მე და არნოლდი ერთმანეთისთვის ზუსტი გადაცემების გაკეთებას ვამუშავებთ. ეს კარგი საშუალებაა, ამის შედეგად, გრძელ გადაცემებს უფრო იოლად ვაკეთებთ", - თქვა რობერტსონმა.

"ჰო, ეს კარგი მაგალითი იყო. ტრენტი იმდენად ნიჭიერია, რომ ასეთი პასების გაკეთება მარცხენა ფეხითაც შეუძლია. ამ ერთი გადაცემით მან "სიტის" 5 ფეხბურთელი გააცურა, მე კი ბურთი მივიღე და დაუყოვნებლივ საჯარიმოში გავგზავნე, რომ დრო გვეხელთა და მეტოქისთვის პოზიციის დაბრუნების შესაძლებლობა არ მიგვეცა.  ყველაფერი იმაზეა დამოკიდებული, რომ მე და ტრენტმა რაც შეიძლება ზუსტად და სწრაფად ვიმოქმედოთ, რაც მეტოქეს პოზიციის დაბრუნებაში უფრო მეტ დროს დააკარგვინებს.

კუთხურები და საჯარიმო დარტყმები 

"ჩვენ სტანდარტებზე ბევრს ვმუშაობთ. პიტს უყვარს ისინი. სტანდარტული სიტუაციები მისი სიამაყე და სიხარულია. როდესაც სტანდარტიდან გაიტან, ყოველთვის იცი, რომ პიტი ამაყობს.სტანდარტები თამაშის მნიშვნელოვანი ნაწილია. შეხედეთ, როდესაც თქვენ ისეთი კარგი ფეხბურთელები გყავთ მეორე სართულზე, როგორიცაა ვირჯილი, ჰენდო, ბობი და სხვები არიან, თქვენ უნდა შეძლოთ ამის მაქსიმალურად კარგად გამოყენება".

"ეს ის კომპონენტი იყო, რომლის დახვეწაც მსურდა. ჩემი თამაშის ეს ასპექტი ბევრს არ მოსწონდა, მაგრამ ეს ყოველთვის დიდი მოტივაციაა, რათა ხალხს დაუმტკიცო, რომ ისინი ცდებიან.  წინა სეზონის განმავლობაში ბევრს ვვარჯიშობდი და ვცდილობდი, ეს კომპონენტი გამეუმჯობესებინა. მინდოდა გუნდისთვის მარცხენა ფეხით კარგი ჩამწოდებელი შემემატებინა. აქამდე ყოველთვის ტრენტი ან მილნერი აწვდიდნენ მარჯვენა ფეხით, მე კი შევეცადე გავმხდარიყავი მემარცხენე ვარიანტი და ვფიქრობ, რომ ეს შევძელი. ჯერჯერობით კარგად გამომდის, რაც განსაკუთრებით "ლიდსთან" გამოჩნდა. იმედი მაქვს, ასე გავაგრძელებ. მე და ტრენტი ვაკონტროლებთ ფლანგურ ჩაწოდებებს. კარგია თუ ცუდი ჩვენ ამაზე მუდმივად ვვარჯიშობთ. ნამდვილად ვამაყობ ხოლმე ისეთ მომენტებში, როცა მოედანზე იმის ზუსტად გაკეთებას ვახერხებ, რაზეც "მელვუდში" ყოველდღიურად ვვარჯიშობ", - თქვა რობერტსონმა.

აუტები

"ვფიქრობ მე და ტრენტი ყველაზე მეტ აუტს ვაწვდით. ყველამ უფრო მეტად მომართა საკუთარი ძალები, რომ ეს ასპექტი ისე შეესრულებინა, როგორც ამას თომასი ითხოვს. ცხადია, აუტი თამაშის მცირე დეტალია, მაგრამ ბურთის შენარჩუნებას ან მეტოქის იერიშების მოგერიებას დიდი მნიშვნელობა აქვს, ამიტომაც აუტებს განსაკუთრებულ ყურადღებას ვაქცევთ. როცა გუნდში მოვედი, ვნახე, რომ ვარჯიშის დროს ბიჭები 50-50 აუტს აწვდიდნენ. ჩვენს ჩაწოდებულ აუტს ყველა მეტოქე უკვე სახიფათო სტანდარტულად აღიქვამს, რაც ჩვენთვის უპირატესობა უნდა იყოს. თომასთან მუშაობამ გაცილებით უკეთესები გაგვხადა", - თქვა რობერტსონმა.

მაღალი დაცვის ხაზი

"ბევრი რამ ითქვა ჩვენს მაღალ ხაზზე, მაგრამ პრობლემა მათში არ არის. ეს იმის ბრალია, რომ მეტოქე ბურთზე აქტიურ პრესინგს თამაშობს. უნდა გავიხსენოთ ისიც, რომ "ლიდსთან" შეხვედრაში ტრენტს ტრავმა აწუხებდა, რომელმაც ჩვენი წინასასეზონო შეკრება გამოტოვა, შემდეგ კი მე, ის, ჯო და ვან დაიკი ეროვნული გუნდების დასახმარებლად გავემგზავრეთ. "ლიდსთან" მატჩის წინ, ჩვენ მხოლოდ 2 სრულფასოვანი საწვრთნელი სესიის ჩატარება მოვასწარით. ნაკრებებში სხვადასხვა სქემით ვთამაშობთ, რაც ჩვენს ფორმას გარკვეულწილად ცვლის და ეს ფაქტორიც გასათვალისწინებელია. დიახ, სამივე გოლის აცილება შეიძლებოდა, მაგრამ იმ მომენტში ცოტას ვღელავდი. ამ სეზონში ისევ წინსვლას და გამარჯვებებს ვაპირებთ, რის გამოც თავდაცვით მხარეს კიდევ უფრო მეტ დროს დავუთმობთ და მაქსიმალურად გავაუმჯობესებთ. ეს არ ეხება მხოლოდ უკანა ოთხ ფეხბურთელს და მეკარეს. ჩვენ გუნდურად ვიცავთ თავს და ვცდილობთ თავი რამდენადაც შესაძლებელია სისტემურად და ერთობლივად დავიცვათ. ამ საკითხს დიდ დროს ვუთმობდით, მაგრამ კარანტინის შემდეგ, რამდენიმე დაუდევარი შეცდომა დავუშვით", - თქვა რობერტსონმა.

ფეხბურთი პანდემიის პირობებში 

"მსოფლიოში სერიოზული რამ ხდება, რაც ამჟამად ათასობით ადამიანს არ აძლევს შეკრების საშუალებას და ჩვენ ამას პატივს ვცემთ. რთულია, მაგრამ ჩვენს თავში სულ ვფიქრობთ იმაზე, თუ რას გრძნობენ ის გულშემატკივრები, რომლებიც სახლიდან გვქომაგობენ. არავის სიამოვნებს დახურულ კარს მიღმა თამაში, მაგრამ ჩვენ უნდა შევეგუოთ ამას. მოხარული ვართ, რომ შეგვიძლია გავაგრძელოთ ვითამაშოთ და გავაგრძელოთ კონკურენცია თასების მოსაგებად, ისევე როგორც წინა სეზონში. როდესაც საბოლოოდ დადგება ის ნანატრი დღე და "ენფილდი" კვლავ გაივსება, ეს საოცარი იქნება. ეს გვიბიძგებს და გვაძლევს მოტივაციას", - თქვა რობერტსონმა.

---