ლივერპულის ფანებმა კლოპს მხარდაჭერა გამოუცხადეს

პრემიერ ლიგის მოქმედი ჩემპიონის მთავარი მწვრთნელი – იურგენ კლოპი კრიტიკის ქარცეცხლშია გახვეული. “ლივერპულმა” “ენფილდზე” ბრწყინვალე წაუგებელი სერია შეწყვიტა და საკუთარ მოედანზე ზედიზედ სამი მარცხი განიცადა. აღსანიშნავია, რომ პრემიერ ლიგის ეგიდით გამართული უკანასკნელი 8 მატჩიდან, მერსისაიდელებმა მხოლოდ 2 მოიგეს.

პრაქტიკულად წარმოუდგენელია, რომ “ლივერპულმა” მიმდინარე სეზონის პრემიერ ლიგის მოგება შეძლოს. პირველ ადგილზე “მანჩესტერ სიტი” იმყოფება, რომელიც “ლივერპულს” 13 ქულით უსწრებს და ერთი მატჩით ნაკლები აქვს ჩატარებული.

წარუმატებელი სეზონისა და ზედიზედ სამი საშინაო მარცხის მიუხედავად, “ლივერპულის” გულშემატკივრებმა “ენფილდის” შესასვლელთან იურგენ კლოპის მხარდასაჭერი ბანერი გადმოკიდეს. “სკაუზერები” კლოპს სრულ მხარდაჭერასა და ნდობას უცხადებენ.

“იურგენ კლოპსა და “ლივერპულის” ფეხბურთელებს. ისევე, როგორც ფენიქსი – ჩვენ კვლავ აღვსდგებით. იურგენ კლოპ, შენ არასოდეს იქნები მარტო”, – აღნიშნულია “ლივერპულის” ფანების განცხადებაში.

გულშემატკივრების პარალელურად, მოჰამედ სალაჰმა საინტერესო კომენტარი გააკეთა: “მრავალი მიზეზის გამო, რთული პერიოდი გვიდგას. ჩვენ ჩემპიონები ვართ და ბოლო წუთამდე ვიბრძვით, როგორც ჩემპიონები. არ დავუშვებთ, რომ მიმდინარე სეზონი მხოლოდ ამჟამინდელი რეზულტატით დაგამახსოვრდეთ – ეს არის ჩემი პირობა, რომელსაც თქვენ ყველას გაძლევთ.”

(73)

ლივერპულის ფანებმა კლოპს მხარდაჭერა გამოუცხადეს

სტატიის ავტორი
-