მსოფლიო ფეხბურთის მმართველი ორგანიზაცია ამერიკის პრეზიდენტის დონალდ ტრამპის განცხადებას გამოეხმაურა, რომელიც აშშ-ს ეროვნული ნაკრების საფეხბურთო მატჩების ყურებას აღარ აპირებს.
აშშ-ს პირველმა პირმა ასეთი გადაწყვეტილება მას მერე მიიღო, რაც ამერიკის ფეხბურთის ფედერაციამ ეროვნული ჰიმნის დროს, მშვიდობიანი პროტესტის მიზნით დაჩოქება დაუშვა.
"FIFA მტკიცედ ემხრობა ტოლერანტობას, ურთიერთპატივისცემასა და საღი აზრის გავრცელებას. როცა ასეთი მწვავე მდგომარეობაა მსოფლიოში, ფიფა ნულოვან ტოლერანტობას უცხადებს ყოველგვარი სახის დისკრიმინაციას. ყველამ უნდა გაიაზროს, რომ ძალადობისა და რასიზმის ადგილი თანამედროვე მსოფლიოში არ არის", - წერია FIFA-ს განცხადებაში.
შეგახსენებთ, შეერთებულ შტატებში მიმდინარეობს მასობრივი პროტესტი რასიზმის წინააღმდეგ, რაც პოლიციის თანამშრომლის მიერ აფროამერიკელი ჯორჯ ფლოიდის მკვლელობის შედეგად დაიწყო.
