რა ჯანდაბა ხდება ბარსელონაში?
2 წლის წინ
ფეხბურთი
2 წთ
ფინანსური პრობლემები სათამაშო დონეზე აისახა: იმ გუნდში, სადაც მეტოქეებს მესი, რონალდინიო, ვილა, ეტო'ო, ნეიმარი, სუარესი, იბრაჰიმოვიჩი, ანრი ატერორებდნენ, დღეს ლუკ დე იონგი და მემფისი ბურთს ფეხს აცილებენ. რონალდ კუმანს უცნაური ექსპერიმენტები უყვარს. ცოტას თუ ახსოვს, რომ "ვალენსიაში" ყოფნისას, არისმენდის მარცხენა მცველად ათამაშებდა და ამისთვის, ესპანური მედია კუმანს თითის გაშვერით დასცინოდა. ბოლო მატჩში კი, ნიდერლანდელმა "ბარსელონა" 3-5-2 ტაქტიკით (?!?!?!) ათამაშა და ფრენკი დე იონგი, ერთადერთი ფეხბურთელი, რომელსაც "ბენფიკასთან მატჩში" ნახევარდაცვაში სიმყარე შეჰქონდა, დაცვის ცენტრში ჩამოსწია.
კი, გუნდის რესურსი გაცილებით შესუსტებულია, მაგრამ... სად გინახავთ, გუნდი ზედიზედ 2 თამაშში 1-ხელ მაინც, მეტოქეს კარს ვერ უმიზნებდეს? ასეთი რამ ჩემპიონთა ლიგის ისტორიაში "ბარსელონას" პირველად დაემართა, თანაც, ვიმეორებ, ზედიზედ ორჯერ. შედეგად, დასკვნა ასეთია: პრობლემა მხოლოდ ფინანსურ პრობლემებსა და ვარსკვლავების გაშვებაში არ მდგომარეობს, რონალდ კუმანი კი ის ადამიანია, რომელმაც ჭაობში თავის გადარჩენა არ იცის და გუნდის დახრჩობამდე სულ ცოტა დროღა რჩება.