25 წლის ცენტრალური მცველი ნიკა სანდოხაძე, რომელიც ბოლოს ლვოვის "კარპატში“ თამაშობდა, დედაქალაქურ "საბურთალოში“ ჩაირიცხა. ფეხბურთელმა ახალ კლუბთან დღეს 1 წლიან ხელშეკრულებას მოაწერა ხელი.
სანდოხაძემ "საბურთალოს“ ვებ-გვერდთან პირველი კომენტარი გააკეთა.
"საბურთალო“ საქართველოში ერთ-ერთი წარმატებული კლუბია. ჩემთვის დიდი პატივია დედაქალაქურ გუნდში თამაში. მიხარია, რომ შეთანხმება შედგა და თბილისური კლუბის მაისურა მოვირგე. კლუბში პროფესიონალი მწვრთნელები მუშაობენ. გუნდი ასევე კვალიფიციური ფეხბურთელებით არის დაკომპლექტებული. ის, რომ "საბურთალო“ წარმატებული კლუბია, ბოლოდროინდელი შედეგებიდანაც ჩანს. ვეცდები, ჩემი მოკრძალებული წვლილი შევიტანო "საბურთალოს“ წინსვლაში. კლუბისგან ინტერესი ზამთარში დაიწყო, თუმცა ჩვენი თანამშრომლობა ვერ შედგა იმ მიზეზით, რომ იმ დროს "კარპატთან“ კონტრაქტი მაკავშირებდა. შემდეგ, უკრაინულ გუნდში ფინანსური პრობლემები შეიქმნა, რის გამოც "კარპატი“ 12-მა ფეხბურთელმა დატოვა. უგუნდოდ ვიყავი, როდესაც გიორგი ჭიაბრიშვილმა სპორტული ფორმის შესანარჩუნებლად, "საბურთალოში“ ვარჯიში შემომთავაზა. ძალიან გამიხარდა და მესიამოვნა ეს ნაბიჯი. კლუბის სათამაშო სტილი ჩემს გემოვნებაში ჯდება. "საბურთალო“ სწრაფ, ტექნიკურ, შემტევ ფეხბურთს თამაშობს, რაც ძალიან მომწონს და მიყვარს. მჯერა, ახალ კლუბთან ერთად ბევრ წარმატებას მივაღწევ," - თქვა სანდოხაძემ.
fcsaburtalo.ge
