ვინ არის ბარსელონას ახალი მწვრთნელი, კიკე სეტიენი?
4 წლის წინ
ფეხბურთი
2 წთ
- კიკე სეტიენის საფეხბურთო კარიერა პლაჟის ფეხბურთით დაიწყო. სეტიენმა ესპანეთის პლაჟის ფეხბურთის ნაკრების მაისურიც კი მოირგო.
- სანტანდერის "რასინგის" ფანები სეტიენს აღმერთებდნენ და მას "ელ მაესტრო" შეარქვეს. ფეხბურთელის რანგში, სეტიენმა "რასინგში" 12 სეზონი გაატარა - მწვრთნელის ამპლუაში კი 2001/02 წლების სეზონში, "რასინგს" ელიტაში აღზევებაში დაეხმარა.
- კიკე სეტიენი მესამე კანტაბრიელი მწვრთნელია, რომელიც "ბარსელონას" გაწვრთნის. ენრიკე ორისაოლა (1961) და ლაურეანო რუისი (1976).
- ფეხბურთელის ამპლუაში კიკე სეტიენი "ბარსელონას" 22-ჯერ დაუპირისპირდა. 5 მოგება, 5 ფრე, 12 მარცხი. "ბლაუგრანას" კარი სეტიენმა ორჯერ აიღო.
- მწვრთნელის რანგში სეტიენის გუნდები "ბარსელონას" 7-ჯერ დაუპირისპირდნენ. 6 მარცხი და მხოლოდ 1 მოგება. 2018/19 წლების სეზონში, "ბეტისმა" კატალონიური გრანდი "კამპ ნოუზე" დაამარცხა.
- სამწვრთნელო კარიერის მანძილზე, კიკე სეტიენმა "რასინგი", "პოლი ეხიდო", "ლოგრონესი", "ლუგო", "ლას პალმასი", და "ბეტისი" გაწვრთნა. დამატებით, სეტიენი ეკვატორული გვინეის საფეხბურთო ნაკრების მწვრთნელის პოსტსაც იკავებდა.
- "კამპ ნოუზე" ერთ-ერთი ვიზიტის დროს, სერხიო ბუსკეტსმა სეტიენს საკუთარი მაისური შემდეგი წარწერით უსახსოვრა: "სიყვარულით კიკეს. დასაფასებელია ფეხბურთის შენებური ხედვა. საუკეთესო სურვილებით - სერხიო ბუსკეტსი."
- კიკე სეტიენი "ბარსელონას" ყოფილ ფეხბურთელებს წვრთნიდა: ბარტრა, კაპტუმი, ტელო, სანაბრია, არაუხო, ჰალილოვიჩი და კევინ-პრინს ბოატენგი. სეტიენი ასევე წვრთნიდა "ბარსელონას" ამჟამინდელ ფეხბურთელ, ჯუნიორ ფირპოს.
- კატალონიური გრანდის ახალი მწვრთნელი "ბარსელონასა" და ლეო მესის დიდი გულშემატკივარია. კიკე სეტიენი ლეო მესის ისტორიაში საუკეთესო ფეხბურთელად მოიხსენიებს.
- კიკე სეტიენს ძალიან უყვარს ჭადრაკის თამაში. სხვადასხვა დროს იგი მსოფლიოს ჩემპიონებს ანატოლი კარპოვსა და გარი კასპაროვს დაუპირისპირდა.