NBA-ის ფლეიოფის პირველი რაუნდის მე-6 შეხვედრაში ,,ლოს ანჯელეს კლიპერსმა'' ,,დალას მავერიქსი'' სტუმრად 7-ქულიანი სხვაობით, ანგარიშით 104-97 დაამარცხა. მატჩში გადამწყვეტი მე-4 მეოთხედი გამოდგა, რომელიც ტაირონ ლუს გუნდმა 11 ქულით მოიგო.
,,კლიპერსს'' 45 ქულით, 6 მოხსნით, 3 ასისტითა და 2 ჩაჭრით კავაი ლეონარდმა ულიდერა. ორმაგი დუბლი გაიფორმა პოლ ჯორჯმა - 20 ქულა, 13 მოხსნა, 6 შედეგიანი გადაცემა, 3 დაფარება.
,,დალასის'' შემადგენლობაში საუკეთესო ტრადიციულად ლუკა დონჩიჩი იყო - სლოვენიელმა 40 წუთში 29 ქულა, 11 პასი, 8 მოხსნა და 4 ჩაჭრა მოაგროვა.
სერიის გადამწყვეტი, მე-7 მატჩი ხვალ, ლოს ანჯელესში გაიმართება. ,,კლიპერსსა'' და ,,მავერიქსს'' შორის გამარჯვებული დასავლეთ კონფერენციის ფლეიოფის ნახევარფინალში ,,იუტა ჯაზს'' დაუპირისპირდება.
