სუმოს სამყაროში 2021 წლის ბოლო სუპერტურნირი - კიუშუ ბაშო მიმდინარეობს.
ბაშო 14 ნოემბერს დაიწყო და ტრადიციულად 2 კვირის განმავლობაში აქტიურ ფაზაში იქნება.
ტურნირის დაწყებამდე სუმოს გულშემატკივრებისათვის ტოჩინოშინის ტრავმის შესახებ გახდა ცნობილი, თუმცა ქართველმა ფალავანმა ტურნირზე დაბრუნება იმ დროიდანვე დააანონსა და ასეც მოხდა - მე-5 საბრძოლო დღეს ტოჩინოშინი დოჰიოზე ბრუნდება.
ამჟამად ქართველი მებრძოლი დასავლეთის მე-13 მაეგაშირაა, რაც მისთვის ბოლო წლების განმავლობაში ყველაზე დაბალი პოზიციაა.
იქედან გამომდინარე, რომ ლევან გორგაძე ანუ ტოჩინოშინი რეიტინგში დაბალ საფეხურზეა და ამავდროულად ბაშოს პირველი 4 საბრძოლო დღე გამოტოვა და ბალანსი 0:4-ზე აქვს, არსებობს საფრთხე იმისა, რომ მან უმაღლეს დივიზიონში ადგილის შენარჩუნება ვერ შეძლოს. შესაბამისად, ეს არის შანსი და ბრძოლა მაკუუჩიში (სუმოს უმაღლესი დივიზიონი) ადგილის შესანარჩუნებლად.
კიუშუ ბაშოს მე-5 საბრძოლო დღეს, ტოჩინოშინს ოპონირებას აღმოსავლეთის მე-14 მაეგაშირა, კაგაიაკი გაუწევს, რომელიც ქართველმა სუმოისტმა აქამდე გამართული 10 დაპირისპირებიდან 8-ჯერ დაამარცხა.