ბილ ბომონტი – კიდევ 4 წლით

„მსოფლიო რაგბის“ მოქმედი პრეზიდენტი, ინგლისელი ბილ ბომონტი, მეორე ვადით აირჩიეს და თანამდებობაზე მომდევნო 4 წლის განმავლობაში რჩება.

საპრეზიდენტო არჩევნებში, რომელიც COVID19-ის პანდემიის გამო, 27-30 აპრილს ელექტრონული მეთოდით ჩატარდა, მან 51-იდან 28 ხმა მიიღო. არჩევნების შედეგები ოფიციალურად 12 მაისს უნდა გასაჯაროებულიყო, თუმცა მხარეთა შეთანხმებით, ეს 10 დღით ადრე მოხდა.

68 წლის ინგლისელი „მსოფლიო რაგბს“ 2016 წლიდან ხელმძღვანელობს. არჩევნებში მისი კონკურენტი 45 წლის არგენტინელი აგუსტინ პიშო (23 ხმა) იყო, რომელიც 2016 წლიდან „მსოფლიო რაგბში“ ვიცე-პრეზიდენტად მუშაობდა.

„მსოფლიო რაგბის“ ახალ ვიცე-პრეზიდენტად საფრანგეთის რაგბის კავშირის ვიცე-პრეზიდენტი ბერნარ ლაპორტი აირჩიეს, ასევე დამტკიცდა ახალი აღმასრულებელი კომიტეტი, რომლის შემადგენლობაში 7 ახალი წევრია. მართალია არჩევნების შედეგები დათქმულზე ადრე გამოცხადდა, თუმცა განახლებული აღმასრულებელი კომიტეტი მუშაობას ოფიციალურად 12 მაისიდან შეუდგება.

„ჩემთვის დიდი პატივია „მსოფლიო რაგბის“ მანდატის მიღება და მინდა ნდობისთვის მადლობა გადავუხადო კოლეგებს ქვეყნებისა და რეგიონალური კავშირებიდა. მართალია ამ არჩევნებში კონკურენტები ვიყავით, მაგრამ ასევე მადლობას ვუხდი აგუსტინს, რომელიც მხარში მედგა უკანასკნელი 4 წლის განმავლობაში და ბევრ საკითხში ვთანხმდებოდით. თამაშის განვითარებაში მისი როლი განუზომლად დიდია“ – განაცხადა ბომონტმა შედეგების გაცნობის შემდეგ და COVID19-ით გამოწვეული პაუზის ფონზე დაამატა:

„უკანასკნელი ოთხი წლის განმავლობაში ბევრს მივაღწიეთ. ახლა დაპაუზებულები ვართ, თუმცა წინსვლა უნდა გავაგრძელოთ. ახლა მაქვს 4-წლიანი მანდატი და ბერნარდთან ერთად პროგრესისკენ მიმართული ცვლილებების რეალიზებას ვეცდები. როგორც ორგანიზაცია, უნდა ვიყოთ გამჭვირვალენი და გავხადოთ სპორტის ეს შესანიშნავი სახეობა კიდევ უფრო უკეთესი. უნდა მოვუსმინოთ მორაგბეებს, გულშემატკივრებს, ჩვენს წევრ ორგანიზაციებს და მივიღოთ გადაწყვეტილებები, რომლებიც ყველას ინტერესს დააკმაყოფილებს“.

„ზეიმის დრო არ გვაქვს. COVID19-ის ფონზე, უნდა გამოვნახოთ თამაშში დაბრუნების გზები, მოთამაშეთა უსაფრთხოების პრიორიტეტებით და ვეცადოთ დავუბრუნდეთ საერთაშორისო მატჩებს საკლუბო ტურნირებთან თანამშრომლობით“.

წყარო: საქართველოს რაგბის კავშირი

(37)

ბილ ბომონტი – კიდევ 4 წლით

სტატიის ავტორი
-