17 ქართული სარაგბო კლუბი განცხადებას ავრცელებს, რომელშიც აღნიშნულია, რომ ბოლო პერიოდში შექმნილ კრიზისულ მდგომარეობას თავი წარმატებით გაართვეს. განცხადებაზე ხელისმომწერები ასევე აღნიშნავენ, რომ ემიჯნებიან კლუბების საინიციატივო ჯგუფის ზოგიერთი წევრის მიერ, მათი სახელით გაკეთებულ რაგბის კავშირის პრეზიდენტობის კანდიდატების მიმართ მხარდამჭერ და საწინააღმდეგო განცხადებებს.
"ჩვენ საქართველოს რაგბის კლუბები გავერთიანდით კონკრეტული მიზნის გარშემო, რომ გამოვსულიყავით ბოლო პერიოდში ქართულ რაგბში არსებული კრიზისული მდგომარეობიდან, რასაც თავი წარმატებით გავართვით და რისთვისაც გვინდა მადლობა გადავუხადოთ ამ პროცესში ჩართულ ყველა მონაწილეს. თუმცა, საინიციატივო ჯგუფის ზოგიერთი წევრის მიერ, ჩვენი სახელით გაკეთდა რაგბის კავშირის პრეზიდენტობის კანდიდატების მიმართ მხარდამჭერი და საწინააღმდეგო განცახადებები. გვინდა განვაცხადოთ, რომ კლუბების საინიციატივო ჯგუფის საქმე არ არის, ასეთი განცხადებების კეთება, ამისთვის არის რაგბის კავშირის საპრეზიდენტო არჩევნები, სადაც ყველა თავის პოზიციას დააფიქსირებს. მანამდე კი ვაკეთოთ ჩვენი საქმე!" - აღნიშნულია 21 სექტემბრით დათარიღებულ განცხადებაში, რომელსაც ხელს 17 სარაგბო კლუბის წარმომადგენელი აწერს.
შეგახსენებთ, ქართულ რაგბში არსებული ღრმა კრიზისის აღმოსაფხვრელად საინიციატივო ჯგუფი შეიქმნა, რომელშიც 31 ქართული სარაგბო კლუბი გაერთიანდა. ჯგუფის წევრებმა და მორაგბებმა 14 აგვისტოს, რაგბის კავშირის ოფისში გამართულ პრესკონფერენციაზე საზოგადოებას თავიანთი გეგმები წარუდგინეს.
"როგორც თქვენთვის ცნობილია რაგბის კლუბების უმრავლესობა შესულია ღრმა ფინანსურ კრიზისში, რისი მთავარი მიზეზი არის კლუბებზე გამოყოფილი მწირი რესურსი, რომელიც 2011 წლის შემდეგ არ გაზრდილა (მიუხედავად იმისა რომ 2 ჯერ გაიზარდა რაგბის კავშირის ბიუჯეტი ამ წლებში) .რაგბის კავშირის უმოქმედობამ აღნიშნული კრიზისი კიდევ უფრო გააღრმავა. დღეს შექმნილია სიტუაცია, როცა სახელმწიფოს მონაწილეობის გარეშე შეუძლებელია ამ კრიზისის დაძლევა.რაგბის კავშირის უმოქმედობის გამო და იმ ვალების ფონზე(6 მილიონი ლარი) რაც მას გააჩნია, იძულებული გავხდით ივნისის თვიდან სარაგბო კლუბები შევკრებილიყავით ქართული რაგბის გადასარჩენად და ერთად შეგვემუშავებინა იმ ღონისძიებების ნუსხა, რომელთა განხორციელება ჩვენი აზრით დაგვეხმარება გადაუდებელი პრობლემების დაძლევაში.აღნიშნული ღონისძიებები, წარვადგინეთ მთავრობის წარმომადგენლებთან. ყოფილი პრეზიდენტის გოჩა სხვანიძის გადადგომის შემდეგ საქართველოს განათლების, მეცნიერების, კულტურისა და სპორტის სამინისტრომ გამოთქვა მზაობა ამ რთული სიტუაციის მოსაგვარებლად ფინანსური დახმარება გაეწია სარაგბო კლუბებისთვის. ასევე მიღებულ იქნა რეკომენდაცია შექმნილიყო კრიზისის მართვის ჯგუფი, რომელსაც კოლექტიურად უნდა ემართა რაგბის კავშირი, მოეგვარებია ჩემპიონატის განახლების საკითხი და მიეყვანა კავშირი პრეზიდენტის არჩევნებამდე, რომელიც გამგეობის გადაწყვეტილებით ჩატარდება ამა წლის დეკემბერში.სამწუხაროდ დღევანდელი რაგბის კავშირის პრეზიდენტის მოვალეობის შემსრულებლის გიორგი გორგასლიძის და არსებული მმართველი გუნდის მიერ სხვადასხვა მიზეზებით:
დღემდე არ შექმნილა ზემოაღნიშნული საბჭო;
მიმდინარეობს ხელის შეშლა კლუბების აბსოლუტური უმრავლესობის მიერ წარდგენილი კანდიდატების საბჭოში შეყვანაზე;
არის ულტიმატუმი რომ საბჭო თუ შეიქმნება არ უნდა მოხდეს წინა განვლილი პერიოდის ხარჯთაღრიცხვის შემოწმება.
გვინდა აღვნიშნოთ, რომ ყოველი დაკარგული დღე იწვევს აუნაზღაურებელ ზარალს ქართული რაგბისთვის და საბჭოს შექმნა არის სასიცოცხლოდ მნიშვნელოვანი, რათა სწრაფად მოხდეს სახელმწიფოს მიერ კლუბებისთვის რესურსის გამოყოფა და რაც შეიძლება სწრაფად განახლდეს ჩემპიონატი. წინააღმდეგ შემთხვევაში ჩვენ კიდევ უფრო შეგვიმცირდება რაგბში ჩართული ბავშვების ოდენობა. გაიზრდება ლიგის მოთამაშეების სხვა ქვეყნების დაბალი დონის ლიგებში გადასვლის ან სულაც რაგბიდან წასვლის შემთხვევები. ჩვენ დიდი იმედი გვაქვს რომ ქვეყანაში ერთერთი ყველაზე წარმატებული და პრიორიტეტული სპორტის გადარჩენა ერთიანი ძალებით შეგვიძლია და ამიტომ ვითხოვთ პრემიერთან შეხვედრას. ასევე გვინდა ვთხოვოთ დახმარება ყველა იმ ადამიანს ვისაც ეს ძალუძს და რაგბის პრობლემები გულთან ახლოს მიაქვს. აქვე დავსძენთ, რომ თუ ყველა კლუბში უახლოეს დღეებში არ აღდგება ვარჯიშები ისე, რომ მაქსიმუმ 26 სექტემბრამდე განახლდეს საქართველოს ჩემპიონატი, დაირღვევა მსოფლიო რაგბის რეკომენდაცია და სავარაუდოდ საქართველოს ნაკრები მოკლებულ იქნება შესაძლებლობას ეთამაშოს შოტლანდიის ნაკრებს და მას დამატებითი პრობლემები შეექმნება რუსეთთან გასამართ მატჩთან დაკავშირებით. გვინდა აღვნიშნოთ, რომ უკვე ძალიან მივუახლოვდით იმ ზღვარს, რომლის გადაკვეთის შემდეგაც რაგბის გადარჩენა და არსებულ სიმაღლეებზე დაბრუნებას დასჭირდება ათჯერ მეტი რესურსი და ენერგია ვიდრე დღეს არის საჭირო. ამ ყველაფერმა შესაძლოა საბოლოოდ გამოიწვიოს ეროვნული და ასაკობრივი ნაკრებების დასუსტება და უამრავი თაობის წვალებით მოტანილი სარაგბო რეპუტაციის გაქრობა საზოგადოებაში. ასევე შესაძლოა გამოიწვიოს მსოფლიო სარაგბო რუკაზე საქართველოს სახელის გაქრობას, რაც წარმოუდგენელი დარტყმა იქნება ქვეყნის საერთაშორისო რეპუტაციისთვის. ყოველივე ზემოღნიშნულიდან გამომდინარე გვაქვს მოთხოვნა რომ სასწრაფოდ შეიქმნას ეს საბჭო და მოხდეს ამსაბჭოს მიერ პრემიერთან რათა ერთად გადავარჩინოთ ქართული რაგბი." - აღნიშნულია მიმართვაში.
