რუსეთის მორაგბეთა ეროვნული ნაკრები, რაგბი ევროპის ჩემპიონატის 2022 წლის გათამაშებისათვის მოსამზადებელ შეკრებაზე გაემართა. "დათვების" ახალმა მთავარმა მწვრთნელმა - დიკ მურმა, თურქულ შეკრებაზე 26 მორაგბეს უხმო.
რუსეთის მორაგბეთა ეროვნული ნაკრები 23 იანვრიდან 3 თებერვლის ჩათვლით, შეკრებას თურქეთში გაივლის, რის შემდეგაც რუმინეთში გაემართება და რაგბი ევროპის ჩემპიონატის პირველ შეხვედრას გამართავს. საყურადღებოა ის გარემოება, რომ ნაკრებში გოტოვცევი დაბრუნდა, რომელმაც ცოტა ხნის წინ სანაკრებო კარიერის დასრულების შესახებ განაცხადა. დიკ მურის რჩეულთა შორის ორი ქართველიც მოხვდა - ნიკოლოზ კაზალიკაშვილი ("სტრელა") და ნიკოლოზ ნარმანია ("კარკასონი") "დათვებთან" ერთად თურქულ შეკრებაზე იმყოფებიან.
შეგახსენებთ, რაგბი ევროპის ჩემპიონატის 2022 წლის გათამაშება 5 თებერვალს, ესპანეთისა და ნიდერლანდების დაპირისპირებით აიღებს სტარტს და 20 მარტს, საქართველოსა და ესპანეთის შერკინებით დასრულდება.
